'u siddru

Jurnata chiuvusa e ri machine su n'fila mò fuju i Cusenza e mi nni vaju ara Sila, ...'ntru cofanu i stivali e pur'u panaru cunzatu paru paru a nnu veru piecuraru, adduru c'arrivu u tiempu 'un vò scampari ma chiudu a machina e 'ngignu a passìari, pu' camignu 'ntra su boscu sulu e spasulatu quannu nu lampu a visuale m'ha 'nchiaratu, sutt'a pioggia ca fa l'arvuri 'mbracchiusi vaju circannu surtantu rusiti e vavusi, a nna vota mi fiermu,'un cridu all'uacchi mia: nu fungiu 'i nu chilu ca si para 'mmianz'a via! U vidi bellu bellu e ari pedi 'i nu faggiu u vulissa scippà ma 'un mi fa ru curaggiu, cch'opera d'arte, fattu ccu'ru pinnieddru e tena ra capu ca para nu cappieddru, chin'u dicia in grecu e chini n'latinu ...ma in italianu è ru fungiu porcinu, l'atri fungi su buani ma sicunn'a mia sul'u siddru è ru rre d'a Sila mia; cum'u fa' fa' sa daveru na meraviglia e s'u lassi n'terra ognunu s'u piglia, ma ju m'u scippu e m'u puartu a Cusenza u fazzu siccà e ru sarvu 'ntra cridenza, ad amici e parienti c'u vuonnu ammirari già m'i 'mmaginu d'a 'mmidia scattari, ohi cum'è biaddru, addui l'ha' truvatu? Ma dintr'a vucca cchi dente abbilinatu! 'Un scomparisci mai add'u puarti puarti e tena nu sapure ca risbiglia ri muarti, civite, lattaruli... ni pù jinghia nu casciune ...tu ricogliati ccu' siddri e cci fa' nu figurune!