L'è sparì el prèvòst del paese, mi no capisso, cussì su do piè,
l'è partì de scondion a fine mese, e la xente se chiedi el perché.
Le vecette riunie sulla piassa, le babaia con tanta passion.
Le sbaruffa e po' le se incassa, ed ognuna vol ver la rason.
Una dise:"El prèvòst l'è spario parchè adess el gà n'altra passion,
ga mollà le toneghe e Dio, par correrghe drio a un troion".
Le se segna devote le donne, ma già n'altra l'è pronta a sparlar:
"Non se tratta de roba de gonne, ma par schei el ga tradio l'altar".
"Ga copà, ..ga robà ..el maledio! E noiàltre in Ciesa a pregàr !
Stò schifòso intànt pàr dà drìo el tràmàva pàr fàrne còpàr!"
Gira el sol sulla vecia piassetta, e le donne sempre lì a ciaccolar,
core svelta un'altra vecietta, che trafelada se mette a sigar:
"I l'ha trovà i l'ha trovà...puareto!
Se vedessi in che condission, distirà de travers sul so letto,
morto secco, par qualche rason.
Se fa sera e se impinsa le luci e le vecette sempre lì a babaiar
adess le pianse e dai sgionfi so occi casca giosse che bisogna sugar.
Dise una soffiandose el naso: "l'era un santo el nostro plevàn,
ogni sera ghe mandavo un baso, innocente de quei co a man.
el aveva rispetto par tutti, sempre pronto a far un piasser,
i devoti par lu i jera frutti da curar con immenso dover".
Cala la notte ormai sul paese, l'ultima vecia la sera el porton,
se vedrà doman come fare par le spese par dar sepultura al pore Don!

(dialetto veneziano)