Cronaca (nù fatt'e corna)

Stammatina, verso le otto, s'è arruvutat'o vico. Strill'e malamorte dint'o quartiere. Cummar'e cummarelle, ancora cu e vestaglie, currevano a vedè ch'era succiesso. Don Gaetano, o macellaro e vasci'a scesa, cu na faccia stralunata e nu cultiello mmano, sbraitava malamente for'o vascio e Salvatore, o parrucchiero pe signora cu o salone m'pont'o vico. "Jesce puttanona, ossaccio ca stai lloco, voglio sapè da quanno te tieni a st'ommo e niente!" Don Gaetà, dicevano e cummare, lasciat'a stà, jettate stu cultiello, pecché vat'a n'guaià? Nun me m'porta, a stà femmena e duie soldi, l'aggi'a struppià. Ma ce pensate? Io a faticà e stà stronza a sse spassà. Guardate ccà, liggite, chisto è o biglietto; stammattina l'aggio truvato arravugliato n'zieme a na bistecca. A mappina a mannava ogni sera all'ommo ca se teneva, pe Giocchino l'aiutant'e dint'a chianca. "Ammore mio, te manno stù filetto, pienzame, miettete in forza, dimane ja fa na guerra dint'o lietto." O diavolo l'ha castigata a stà puttana dichiarata. O metteva pure in forza! A mè, faceva o brodino la cara mogliettina. No! Io l'aggio accidere a tutt'e dduie! E sbavanno comm'e nu dannato, o povero don Gaetano partett'e quarta. Dette na curnata dint'a porta, pardon na capata dint'a porta, accussì forte ca s'accasciaie pe terra. Pareva muorto. E cummare subito l'aiutarono, chi o sciusciava, chi o dev'a bere, ma don Gaetano non rinveniva. Chiammarono o cientodiciotto, doppe dduie minute arrivarono a sirene appicciate. Venette pure a Polizia ca sse mettette a indagà. Pe tramento, e duie malamente, asciettero do vascio e ssa squagliarono. Don Gaetano, pover'ommo, oltre ad esere cornuto stà pure male cumbinato, tre mis'e ricovero e prognosi riservata.