Bambulè

Bambulella è na figlia da guerra! Sott'e bombe n'ammore scippato, nu Crucco surdato a na figliola sbandata. Bambulella è na fronna d'ulivo, quanno nasce a guerra fernesce, a mamma, sfurtunatella, parturisce dint'a nu burdello. Bambulella è figlia e nu vascio, nu tugurio n'copp'e quartieri a ddò dimane è comm'è aieri e o juorno s'ammesca c'a sera. Bambulella pazziava all'ascuro, accucciata a n'angolo e muro, e rummure de molle do lietto mentre a mamma venneva ll'ammore. Bambulella pazziava e aspettava ca o rummore do lietto ferneva, dint'o core a nennella sapeva ca l'ammore da mamma era o suoio. Bambulella è na figlia da guerra, ha vissuto na vita e battaglie, e rummure, e scuonci dint'o scuro, Bambulè, chi te dà na medaglia?