'A vita

Mpapucchiato d ' 'a speranza 'e dimane l'ommo parla, senza arricietto e cu mille smanie scetanneso ogni matina fa discorse pe' tutt' 'a vita; appriesso a lli staggione cu 'o core 'ncantato se ne va annamurato a spasso p' 'o munno, si mentre corre o passea pe' suspirà se ferma, nfilato 'o filo d ' 'a fantasia, si nun arricama suonne cose o arrepezza pruggetto. Maje cuntento, maje sazio, si spenn' 'a putega d ' 'a vanità, 'e cose s ' arrobbe cu l'uocchie: 'a meglia rrobb' 'a vo' p'isso! Si s'affiata cu na femmena, s'accatta figlie ca danno penziere. Saglie, scenno, corre mmiezzo all'anne ca passano fujenno; cu na smania d'alleria pe'luntano part' 'e pressa affruntann'a vita; cu curaggio aspetta, ca chissà, si pe' na vota nu suonno suoje s'avvera! Nu bello juorno, a ntrasatto, senza sciato annanz' ' a na sagliuta, a quatt'uocchie, po' c'appura? Appura ca 'na fronna secca e' addeventato! Nu filo 'e vita appena l ' rummane! Senza parla', appucundruto s'arritira dint'a n'angulo scuro e, pigliannes'a vita comme veno, la', aspetta ca nu colpo 'e viento, senza scrupulo e pieta', luntano s ' 'o porta dint'a nu fuosse cupo! Comm'a tutto chesto 'e vvote aggio pensato! Mo 'o saccio, o 'veco, 'o sento ca tutt'o rummore da vita, mo pe'uno, mo pe' n'ato, sulo silenzio po' addiventa; sciuè sciuè, a vita s'accucciuleja comm'a nu cane ca s'arretira doppo tanta abbajo, tale e quale a 'o rummore 'e na banda ca scassea d'int'a strada 'e nu paese, ca quann'a sunat' 'o gran finale, moggia moggia, zitto zitto, s'alluntana e, cchiù nun sona!