Dialettali 28 aprile 2012 · lettura 2 min · 1023 letture

+ Segui

C'è futra stamatina 'e varchi ruossi, ci sunu tutti i viecchi capitana vinuti p'ascutari li palluna c'avannu ci amminiscianu i riffanti. C'era 'u zu Santu, e c'era 'u zu Caloriu, granni navigatura d'autri tiempi, c'a vila navigaru tutti i mari. 'U zu Vanni, 'u zu Fulippu, 'u zu Turi, ognunu ca so' storia ri cuntari, ognunu ca so' vogghia r'ascutari. Cu parla oggi? Rici 'u zu Pasquali. 'U vici sinnucu, ancora nun lu sai? Cui? Chitru ca pu beni ru paisi nnì cumminò sta speci ri frittata? Prima ca ci mittissiru li manu, 'a nostra praia era custuruta ra 'urfatetra c' adducia 'a maretta. C'un capu a vientu e anticchia ri mascia si putienu affruntari i corpa 'e mari, speci quann'era ura r'ammurrari. Ora mancu c'è puostu p'asciucari i nuostri rizzi e priparari 'u scaru. Chi vai riciennu, ci rissi rasi Vanni, 'un viri c'on c'è scara e mancu varchi? Unni su' i marinara e i piscatura? Sintimini u cumiziu stamatina, sintimici prumettiri nu puortu cchiù 'ranni, o quantu a chitru ri Missina, puoi iamuninni va', ca cca' 'un si campa!

♥ 0 💬 0

© Tutti i diritti riservati. L’opera è protetta dalla Legge 22 aprile 1941 n. 633 sul diritto d’autore: è vietata la riproduzione, anche parziale, senza il consenso dell’autore.

Giovanni Sammataro