Che m’è succiesso!

Che m'è succiesso da quanno mettennemo na mazza 'e scopa sott' 'e cosce, comme si fosse stato nu cavallo, cu na scimitarra fatt' 'e cartone rinfurzato curreva a fa guerra cu 'e nemico ca steva p'arrivà; da quanno m'abbuscaje na preta 'ncapo, doppo na secutiata? Che m'è succiesso da quanno appuntunato a l'angulo 'e nu vico apettava tremmanno ca passasse na figliola e 'o core dicesse: -Mò ca passa lle facce 'o surdeglino, m'accosta e lle dico: Vuje, mme facito suspirà? Che m'è succiesso 'a quanno na femmena me mannaje a dì ca me vuleva e i', gamme chïate, appuiato restai nfacce 'a nu muro c' 'o core ca sbatteva e tremmava p' 'a nuvità? Che m'è succiesso 'a quanno addiventato n'ommo, sturduto d' 'a speranza ca runzea, mpapucchiato da mille sbarìe 'o tic- tac 'e nu rilorgio accuminciaje a cuntà juorne, anne e malincunie? Che m'è succiesso? M'è succiesso ca me so' fatto viecchio! St'uocchie senza chianto e stu core tutto curaggio hanno capito 'a verità! Mò 'o saccio! E chi se ne mporta si me restano 'a sfuglià sulo poco pagine primm 'e nserrà 'o libbro d' 'o destino c' 'a vita, passanno comm'o viento arapette tàntu tiempo fà!