Malutempu

Sutta un celu cinirinu ccu li nuvuli ammattuliati lu mari s’annaca... e l’ondi sciancati parinu avissiru vivutu vinu. Semu stinnicchiati, aspittannu lu suli ma nun c’è spiranza ca possa spuntari. Lu tempu passa e lu scuru cumincia a calari e nni lassa supra ‘i sdraiu menzu addurmisciuti. Quannu s’arruspigghia un raggiu anchi squaratu tutti a calari la seggia plastificata... ma è sulu una vera minchiata e lu mari si curca ammarraggiatu. Sarà pì la prossima jurnata quannu la luci cumparirà ccu bbona furtuna senza mura ri balatuna o celu a buttuna pì arrustirinni ccù ‘na fiammata squaquaracchiata. Ddù jornu rimpiangeremu lu celu cinirinu picchì era friscu curiusu e malantrinu senza suli ca putissi li carni abbruciari e tuttu lu paisaggiu quariari. Ora ccu stu cavuru ti senti tuttu squaratu e lu cammisuni è tuttu suratu ca mancu tutta l’acqua ri lu mari potrà mai farlu arrifriscari.