Pi st'estati

Pi st’estati mi nni vogghiu jiri a mmari, vogghiu arricriarimmi ccu la mè famigghia roppu tanta fatica ri travagghiari, sacrifici ed aviri liccatu scorza e canigghia. Pi st’estati vogghiu partiri ccu tutti’i sanareddi e navigari in una cruciera pi viriri paisi luntani ed affascinanti, stinnicchiatu da matina a sera ccu tutti li servizi ri un maragià. Vogghiu partecipari a fistini e fisticeddi, sunari musica e gòdiri ri jochi e rilassamenti pi tuttu lu tempu ri sta miritata sirinità. Ma taliannumi li sacchetti, mi cala prestu a depressioni... Ricinu: cci fu l’inflazioni! Li politici, tantu sperti, misiru a criari tassi e balzelli comunali pi far quatrari lu gettitu fiscali e munciri sta vacca alla granni lassannucci in canuttera e mutanni. A mmia, a li mè figghi e a me muggheri rimani ri pigghiarinni ‘a siggitedda e assittati nta lu pitruni ca vasa lu mari, pinsari scunsulati cosa viviri e manciari . E taliannu l’onda ca si fracassa, ammucciati fra li scogghi sugnari pi non incappari anchi nni la tassa ca paanu chiddi ca sognanu, rispiranu e talianu lu mari.