Dialettali 2 giugno 2015 · lettura 2 min · 540 letture

L + Segui

Chisà chi te l’ha dato sta pacienza Eppure tutt’’e juorne ‘e vaje cercanno Pecché tu ‘o ssaje so’ aneme ‘nnucente Pirciò suppuorte chello ca te fanno. Tu si’ cusciente ca songo creature E pensarraj facimmencelle fà Te tiene na carocchia, t’abbandune E te staje quieto senza risciatà. ‘E guarde ‘nfunno all’uocchie, ’e tiene mente Cercanno d’’e capì d’’e fa pazzià E quanta vote po’ ‘mpruvvisamente E zumpe ‘ncuollo p’’a felicità. Cu lloro cchiù ‘e nu cane tu si ‘o pate E guaje a chi s’azzardasse d’’e tuccà Avesse ‘a te ‘a cchiù grossa muzzecata Tu ce appizzasse ‘a vita p’’e salvà. E io ‘e vvote penzo ca si chisto è ‘o munno Se so’ sbagliate a te chiammà animale ‘a vera bestia è sulamente l’ommo tu no- nun saje nemmanco che d’è ‘o mmale ‘O mmale stà ‘int’’all’anema d’’a gente Ch’arrobba e accide senza avè pietà Va na cullana ‘e lacreme spannenno Senza curarse ‘e tanta ’nfamità.

♥ 0 💬 0

© Tutti i diritti riservati. L’opera è protetta dalla Legge 22 aprile 1941 n. 633 sul diritto d’autore: è vietata la riproduzione, anche parziale, senza il consenso dell’autore.

Luciano Somma