Dialettali 3 settembre 2015 · lettura 1 min · 2362 letture

+ Segui

Areto a na fenesta maledetta ‘o core ‘e na guagliona ancora aspetta ca ‘o munno se fa allero e se culora caccianno ‘a dint’a notte sta malora c‘a stregne quanno appena peccerella ‘o mmale s’a vasaie cu na manella. Areto a na fenesta senza sole na vocca dice justo ddoie parole pe’ me pe’ te pe’ mo’ pe’ chesta vita cercanno ‘e avvalurà chesta partita ca tutt’e gente joca ‘ncoppa ‘a terra appena ca nu core ‘o pietto ‘nzerra. Areto a na fenesta dispettosa ‘o tiempo s’è affacciato c’a cemmosa zuzzuso vrucculillo e spingulato cu appriesso ‘a voglia pe’ te fa’ surdato ma ‘a chiocca ca sbarea nun s’accuntenta e ‘o cielo dint’a all’aria tene mente. Areto a na fenesta chiusa o aperta ‘a sciorta è comme ‘a cora ‘e na lacerta ca sbatte zompa e tremma si è tagliata e cerca ancora quacche ventecata e vola dint’o cielo ‘e sta lumera sbarianno pe nu juorno ‘e primmavera.

♥ 0 💬 0

© Tutti i diritti riservati. L’opera è protetta dalla Legge 22 aprile 1941 n. 633 sul diritto d’autore: è vietata la riproduzione, anche parziale, senza il consenso dell’autore.

Peppe Cassese