Ncrucianno 'a morte

Mmiezz’a via cammenanno quanta vote, senza vulerlo, l’uocchie ncopp’a chilli manifeste burdate ‘a lutto sò cadute; dèceduto e sbiadito nun nomme scunusciuto appena se leggeva. Cu ‘o core, senza dicere niente a nusciuno, spisso po’ aggio pensato: - Comm ’a n’amico fedele, d ’ ‘a matina â sera, annascosta aspettanno d’int’a l’ombra, pronta pe’ ce abbraccià, senza parlà, da che munno è munno, ‘a morte ce accunpagna! Sempe a l’erta, maje stanca, comm’a na sentinella essa ce spia e vede chello ca facimmo! Na distrazione, na malatia so tutto occasione bone pe’ ce correre ncuntro e ce carrià... a l’ato munno! Quanno all’appuntamento puntuale s’appresenta e ce piglia sott ‘o vraccio, avvellutata comm’a na sposa, vestute ‘e niro, festa le facimmo : sciure, musica, curteo, cerròggene, lacreme e marmo d’ata qualità per essa sò sempe pronte. Nu juorno addò uno, nu juorno addò n'ato sempe trova che ffà, e maje ‘a spasso stà! Àneme senza sciato, trasporta in quantità! Â mità autunno, quann’a malincunia, piglia pure a ‘ lu tiempo, pe’ st’impegno custanto ca essa teno pe’ tutto l’anno, ggente ‘e tutto specie, buone e malamente, addulurata ma dèvota â casa soje và a visità! ‘A casa soje? E chi nun ‘a cunosce! ‘A casa soje è addò stanno chillo ca cchiù nun ce stanno, là, addò ‘a poco, mpruvvisamento nu juorno scarugnato pure papà mio se ne juto! Parlà d ’ a morte pe’ chi è vivo, arricurdarse ‘e tutto chillo c’avimmo perduto, na bella cosa nun è, e, si a Essa ce penzammo buono ‘a pella s’arriccia e dint’a nu mumento a vita se fa scura! Siente all’ora, ch’hai abbisogno ‘e luce e accussì a lu surriso e a' carezza d ’ ‘a speranza ‘o core corre e se cunsegna pe’ putè cu ànemo e curaggio affruntà chello ca primmo o doppo puro l’aspetta! Ah ‘a ggente, ‘a ggente ca smania e se ammuïna, ca fa finta e nun sapè ca nterra o d’int’a nu cufunaturo, cunsignato a nu scunusciuto, comme si non fossemo maje stato abbandunato d ’ ‘a vita lasciate po’ venimmo! Doppe tantu tiempo chi maje cercarrà nutizie ‘e nuje, che remarrà maje d ’ ‘a superbia e d ’ ‘a mmiria nosta quanno passata ‘a chianozza d ’ô tiempo, metuto d ’ ’a fauce affilata d ’ a morte, polvere tutt’aguale ‘a limma ‘e l’Eterno ce arriduce!