L'unuri t'apparteni

Terra di confini pi l’omini e terra di mezzu pe santi, ntentu di profughi e di delinquenti ca di tia e da to’ storia nun sannu propriu nenti. Nun sannu ca fusti casa pi Normanni e pi Fenici, abitazioni pi Arabi e pi Greci e ca fusti origini di canciamenti pe’ sbarchi di milli ca cammisa russa e poi, dopu jorna di bombardamenti, di na firma misa e quattru i cursa. Di tia nunn’anu rispettu e cercunu a ricchizza ca tu teni stritta nti lu pettu, doti di matrimoniu pi cu ancora t’apprezza. E tu, caura, abbruci pe’ niuri aceddi ca sciusciunu nto luci e spinciunu in cielu faiddi. Abbruci ri sutta e di supra e lu sangu ca rintra ti scurri comu n’ciumi i lava nun lassa nenti mentri fora curri. E stu focu si fa sempri chiù ghiautu e si fa sempri chiù forti ca prima o poi a genti onesta s’adduma e s’arruspigghia ca li veri mostri nun sunu Scidda e Cariddi, ma l’infami ca p’un votu sacrifica macari li picciriddi. E a fini li cuscenzi di cu ti voli beni no cielu s’aiunciunu e co tantu ciato na nuvola aunciunu pi scatinari u diluviu ca anneia li peni e ti runa in arrieri l’unuri ca t’apparteni.