Traseva maggio

Traseva maggio, era ‘o quatto o ‘o cinche si nun me ricordo malo va trova comme fuje ca tu senza pena e lacrime, doppo na vampata d’ammore Rusaria mia cagnaste idea! ‘E prete e senza scanzo, comme si niente fosse stato, senza n’appiceco, me dicisto: - St’ammore nun po’ essere, nuje: ce avimmo spartere! Ognuno ‘a via soja, addà piglià! - Facetto comme vulisto tu: svacantato, senz’aizà ‘a capo sfreggiato d ‘ ‘e parole toje, po’ munno sbattuto, all’intrasatta sprufunnaio d’int’a nu dulore doce e amaro. Pugnuto ogne juorno, da aco suttile, strille ‘e morte pe’ anne po’ stu core mannajo! Quanta sete suppurtaje senza na goccia d’ammore sta pòvera anema mia! Senza cchiù rareca, sta vita fatta ‘e niente, scioro sicco addeventaje! Ammore te perdetto pe’ sempe! Mo ca niente spero, struppiato da ‘o tiempo e secutiato d ’ ‘a morte, i’ chiù manco m ’ annasconno si veco ca me vene a ncuntrà! Credime, ammore perduto si s’appresentasso ‘e maggio e me carriasse appriess’a essa t’assicura, siccome doje vote nun se po' murì, certo e overo ca manco me n’accurgesso!