Spiaggia "Orlandina"... Muvimentata

Estati. “Spiaggia Orlandina". Lu ciatu da genti senti arreti a schina. Cu ‘nta l’acqua ‘mmuddatu. Cu supra lu telu stinnutu, da lu suli ‘rrustutu. La signura ‘da la peddi delicata sutta l’umbrelluni eni ‘ncuddata. Di scena ‘u palistratu, ca supra ‘a spiaggia avi sfilatu. Da la fimmina puntatu e cunsulatu. Fimmina, miravigghia dû criatu, lu so fisicu da ‘nu stilista fu disignatu. C’eni lu tipu raffinatu, supra ‘na sdraietta ‘ccumudatu, si lu vidi supra li petruzzi camminari, risata po’ scappari Personaggi scurrunu ogni mumentu. Da lu picciriddu ca curri comu lu ventu, a lu vu cumprà, da lu sorrisu spentu. Pu lu tramuntu arrivò l’ura miravigghia di matri natura, lu so salutu, dilizia d’ogni criatura.