Dialettali 15 dicembre 2007 · lettura 2 min · 949 letture

+ Segui

Sunava mezanotte 'o campanone d'a chiesa ch'affacciava miez'a piazza e cummigliava, quase a' protezione, tutt'o rummore fatto d'a carrozza. Bella era 'a notte e chella luna chiena brillava 'ncopp'e briglie d'e cavalle: nu core amante nc'è niente c'o mantene e è disposto pure a rischia' 'a pelle. Chesto 'o sapeva il giovane Fabrizio, strignennose int'e braccia cu Maria, ma nun immagginava che supplizio da nu marito 'mapzzuto 'e gelusia. e mentre se spartevano 'o peccato, strignennose spugliate int'o lietto, aret'a porta nu sicario armato 'mpugnava 'n'arma, pronto a fa' vendetta E s'ammiscava 'o sanghe miez'e strille dint'o scenario janco d'e lenzuole: protagonista 'a lama 'e nu curtiello e testimone 'a luce 'e 'na cannela. Muretteno abbracciate int'o peccato, si è maje peccato l'ammore 'e chi vo bbene, 'o sanghe 'e uno se 'mmiscaje cull'ato mentre chiagneva 'ncielo 'a luna chiena. E ancora oggi, doppo tantu tiempo, appena l'onna s'abbraccia a mare o scoglio, manteneno 'a prumessa 'e 'nu -pe sempe- strillanno int'all'aria -io te voglio! - e dint'a piazza 'e san domenico maggiore ddoje ombre 'ncielo volano abbracciate: songo l'amanti che fanno ancora ammore pecché l'ammore nun è maje peccato

♥ 0 💬 0

© Tutti i diritti riservati. L’opera è protetta dalla Legge 22 aprile 1941 n. 633 sul diritto d’autore: è vietata la riproduzione, anche parziale, senza il consenso dell’autore.

Roberto festa