Dialettali 4 marzo 2020 · lettura 3 min · 1275 letture

G + Segui

El tempo l’é come un buteleto no’l gh’à creansa, no’l gh’à rispeto e quel che drento passa a la so’ testa lo cose con el sol, con l’acqua lo tempesta. A volte, de sera, cheto, el se indormenta la luna resta accesa nel cielo a luce spenta ma se la luna storta la se mete parfin el padreterno el perde la so chiete. El tempo se mostra un fià indeciso se sconde tra ‘na lagrima e un sorriso che tuti che dimanda dei favori ma ognuno pensa solo ai so dolori. Ma el tempo no’l gh’à tempo de scoltare de tute le persone el reclamare così co’ tute le richieste che ghe riva al tempo manca el tempo par decida. De solito el tempo l’è sincero no’l dise che fa bruto e ‘po fa belo e quel che scrive in cielo al tramontare lo lesi la matina, finido de sognare. Ma quando quel che scrive non contenta, la gente, infastidida, se lamenta "el tempo l’è balordo" i taca a dire "el scrive ben, savendo de mentire". Così che nase el tempo dispettoso che porta guai al popolo operoso che suda e fa fadiga inutilmente par colpa de sto tempo irriverente. Ma el tempo no l’è miga un Re sovrano che par voler de Dio l’è sempre sano e anca la so testa se scombina se quelo che la nutre la rovina. El tempo l’è anca un po’ invidioso par questo che con tuti fa el prezioso e ognuno deve far la riverensa se’l vole avere un poco de clemensa e farlo andare pian co’ la va ben e farlo corar quando ghe convien e guai se no’l gh’à lù sta preminensa ghe basta poco par far ‘na turbolensa. El tempo l’è pasiente par natura no’l sa capir la presia e la premura parché la gente core come mati a cominciar dal giorno che i è nati. Se ognuno se tolese el giusto tempo sentati su la riva de sto campo da la so sponda se podria vardare che cosa el fiume porta in riva al mare. El tempo mostra sempre la so’ età no’l cerca mai de farne la metà nascandarse no’l vole tra i dotori che taia, cuse e incola tra i dolori e quando po’ te vè ne la balera te casca culo, petto e la panciera che al cinema te paghi par intero anca se’l film l’è vecio e in bianco e nero. El tempo l’è metodico e preciso no’l cambia mai da quando l’à deciso che la misura del so caminare in tuto l’universo resta uguale. Ma l’omo l’è da mo’ che l’è impreciso non sempre par rason, ma par intrigo el tempo ne ricorda che la vita par torto o par rason no l’è infinita. El tempo l’è un farmaco potente che cura tuti i mali de la gente bisogna avere solo la pasiensa ch’el tempo ne dispensi la so siensa. E l’omo sensa el tempo no’l pol stare anca se ugual par tuti non me pare che l’omo sensa el tempo non saria che atomi che ha perso l’energia.

♥ 0 💬 0

© Tutti i diritti riservati. L’opera è protetta dalla Legge 22 aprile 1941 n. 633 sul diritto d’autore: è vietata la riproduzione, anche parziale, senza il consenso dell’autore.

Giampaolo Ventoruzzo