E tu

E tu ca sì pe’ me nu se e nu ma te spasse ‘ncopp’ ‘a terra a ‘ntravuglia’ sparanno sentenzielle ‘nzuccarate sfuttenno ‘o sacicciotto a chi t’è frate ma ‘a ‘nzogna nun fa ‘a rappa senza ‘o puorco e ‘a sciazza nun’è lota senza ‘o spuorco. E tu ca si pe me nu va’ e n’embè t’è fatto na cuperta chiena ‘e ave’ pittanno na tempesta ‘nzazzaruta sulianno meza faccia scanusciuta ma ‘a vita senza core nun se tratta e ‘a notte priv’ ‘e suonne nun s’accatta. E tu ca sì pe me nu viernarì nun dice puntualmente maje nu sì cantanno serenate assaje schiattose sunanno ‘e lacremelle cchiù lagnose ma ‘a luna senza cielo è nu ziracchio e ‘a penna senza foglio è piripacchio. E tu ca sì pe me nu sì e nu no t’è miso ‘ncopp’o trono p’ ‘o ‘ndindò cercanno ‘e fa’ ‘a reggina ‘e tutt’ ‘a storia scavanno sulo scuse int’ ‘a mammoria ma ‘a preta senza sciummo è na muféta e ‘a fronna senza verme nun’è seta. E tu ca sì pe me nu poco ‘e cchiù t’affacce a sta fenesta a fa’ zu- zu sbarianno notte e juorne ‘nfaccia ‘o jetto facenno a sta campata ‘o scarfalietto ma ‘o fuoco senza lampa è na pastetta e l’ommo senza ‘e te è...BARZELLETTA!