Dialettali 21 gennaio 2009 · lettura 1 min · 1404 letture

+ Segui

Dintra sti quattru mura, stanotti, sulu e abbannunatu, nun pozzu pigghiari sonnu, fora 'na chiazza c'è troppu vucciria. E' la to festa, Santuzza mia! Iu, sciancatu di un'amma, ti pozzu sulu ammirari, da finestra ra me casuzza. Quantu genti s'arricògghiunu pi 'Ttia e quantu luci s'addumanu 'na to bedda Palermu. 'Na st'iorna di fistinu, nun si talianu sordi pi fariti festa. I notti nun pàssanu mai e nall'aria è forti lu ciàvuru, di sfinciuni e babbaluci. Ogni annu, supra du carru triunfali, si sempri chiù bedda e luminusa. Nuddu putrà mai scurdari, chiddu ca facisti pi nuàtri. Ora Santuzza mia, ti pregu, 'na grazia m'affari, di fàrimi scìnniri sti scaluna, senza stu lignu ca m'accumpagna mutu e di vinìriti a ringraziari inginucchiatu, 'na to Santa grutta, unni Tu, t'addummiscisti pi sempri e iu, pi sempri, ti sarò divùtu.

♥ 0 💬 1

© Tutti i diritti riservati. L’opera è protetta dalla Legge 22 aprile 1941 n. 633 sul diritto d’autore: è vietata la riproduzione, anche parziale, senza il consenso dell’autore.

Claudio