Chiddru ca facemu avemu fattu

Ricurdava  Pippineddra a so mammuzza  ca ogni matina  si susiva lesta lesta.

Era na fimmina di punzu, affamigliata e travagliata, cu  tanti picciliddri ancora nichi.

A so jurnata accuminciava quannu  u gaddru  cantava, quannu u suli timidu e lentu accuminciava a tuppiari ni  persiani. Ancora i carusi  eranu tutti sutta i cuperti e iddra, adasciu adasciu senza pipitari s’ accuminciava a priparari a jurnata.

Nisciva,  dopu un pocu, tutta cummigliata, un nc’ era mancu un’ arma ni ddra strata, allungava u passu e cuntava i vaneddri e  lu cori c’ iacchianava  fin’ a mmucca, quannu  vidiva di luntanu qualchi canazzu.

Avia prescia  e un vidiva l’ ura d’ arrivari ni so matri e so patri.

Unn’ eranu ranni, ma nun stavano tantu boni, eranu tutti dù sempri malati e u primu so pinzeri eranu iddri.

Apriva ca so chiavi, trasiva e si l’ accarizzava comu picciliddri na naca. So matri la taliava tutta  priata, a so patri si ci apriva u cori e cu vuci ancora lenta e nzunnacchiata, ci diciva sempri ogni matina “ ma chi vinisti a fari figlia mia, cu tanti picciliddri intra di sfamicari? ”

Arrispunniva  iddra “ è u cori ca mi porta ni vossia, un pezzu da me vita è ndra sti mura, nun penzu a li fatichi, nun minteressa, nun pozzu fari nenti si  nun mi cuietu a testa pi li me vecchi  di prima matina .

Ci lassava ncapu u  tavulu na bella mbroglia di pani frisca  e riturnava suddisfatta a so casuzza .

Addrivigliava  a tutti e s’ allistiva a  priparalli pi a scola.

Pippineddra  taliava a so mà tutta cuntenti  ma po’ vidennula di prima matina troppu stanca, s’ affungiava e ci diciva “ Picchi  tu sula fa sti matinati, picchi cu tanti soru e frati? E iddra surridenti   e senza pila ni la lingnua,  c’ iarrispunniva cu ddra vuciddra fina e senza cirimonii “ Chiddru ca facemu, ricordalu sempri, un gnornu l’ avemu fattu, beddra mia. Ora nun po’ capiri si ancora nica, ma quannu l’ anni diventanu un pisu, scrivitillu nfrunti  e un ti scurdari nenti,  puru a ttia ponnu mancari li forzi e sulu allura  pinzannucci  po’  capiri.

Si zittiva Pippineddra  e nun capiva ancora ..

 Passà  tantu tempu, currì lesta  la so vita, cu a peddri  vecchia  e puru iddra ora cu tanti storii di cuntari.. pinzava a li  so nanni  e si truvà a so matri sempri  cchiù stanca e vecchia e cu tanti acciacchi ca l’ abbattivanu,  lu scantu di perdila ogni jornu si faciva sempri cchiù granni, era bianca, malata e senza forza di parlari,  era abbattuta di ddra vita travagliata c’ avia fattu..

 Si ci stringi lu cori a Pippineddra  vidè  iddra nun si sintiva tantu bona ma.. ci tiniva   i mani a so matruzza  e ci macinavanu  ntesta  ddri  paroli, ca quann’ era picciliddra so mà ci faciva schifiari (chiddru ca facemu un gnornu   l’ avemu fattu) e s’ addisiddrava, cu tuttu u cori, di vidila  campari  senza piniari e senza  ca u Signuri   ci dava duluri..

 E  pinzava sempri  “ a vita è na rota ca firria, aieri appi bisognu me nanna, oi me matri e dumani  na vicchiaia tocca a mia”.

                                                                                                Melina Licata