"Ma che malesere sto benesere" (dialetto alto- Veneto)

I dis che viven in te a società del benesere,  de l’abondanza,  sarà anca vero, ghe  ne de tut, dal ciodo  fin come un cavel a machine grande come case, ma tut questo nol vien par gnent, qual elo  el prezo che se paga par averlo? Mi pense ‘na roba sol, ‘na volta ghe n’era fameie  co vinti boce  da mantegner, l’era dura, ma ben o mal co l’era mezodì i catea tuti ‘na supiera de fasoi su a tola e i deventea tuti  grandi senza morir de fam. Ades se un operaio de cità el vese vinti fioi sarilo bon de mantegnerli col milion e medo ch’el ciapa al mese? De sicuro, co quel  che costa i fasoi, nol podaria pi tirarli su a fasoi, ghe tocarie contentarse de e patate. Sarà anca benesere  ma mi vede che i e tuti  che i cor come mati, par che i apie el fogo soto el cul, i e tuti  indafaradi  parché  el sol el magna e ore e non ghe ne temp da perder, "el temp l’e schei". ’Na volta se ‘ndea pi calmi,  se ‘na roba no ‘ndea fata ‘ncò, la ‘ndea fata doman. Ghe n’era magari el paron o el fator  che qualche volta ne rompea  i coioni,  ma bastea  sbasar  la testa e darghe rason quei do tre minuti ch’el ne vegnea da rente e dopo tut l’era come prima. Ades inveze,  che ne par de eser  tuti  liberi, quanti paroni avene che ne comanda? Quel che ne dà i schei che no l’e mai content de quel che fen, quel che ne ferma par la strada e ne domanda i documenti e dopo el trova sempre qualcossa  fora posto. quel che ne sta par sora e ch’el reclama sempre par qualcossa  che ghe dà fastidio, quel che ghe ven vendest la roba e no ghe ne mai verso che nol trove qualche difeto. ’Na volta se era forse pi poreti, se se vestia co quatro straze e par scarpe se usea e tomere, ma, a la sera, ‘pena che se se butea do sul let, se ciapea subito son, senza bisogno de tute ‘e pastiglie e ‘e medizine  che i dopera ’ncò. Se era forse ignoranti, no se savea ne leder ne scriver, ma ne servia anca poc, no ghe n’era tute ‘e carte che ghe n’e ‘ncò, l’unico libro che se ‘vea l’era el mesal par ‘ndar a mesa, ades inveze l’e tuta ‘na carta, denuncia de questo, denuncia de ‘sto altro, no se pol gnanca pi morir se no se ha firma prima diese carte. Eh si, el progreso l’a portà  tante bele robe, ma no l’e tut oro quel che lucica, ’na volta no ghe n’era tute le esigense  de dì de ‘ncò e co se ’vea quel poc che basta se era tuti a posto, ades, par quant che ‘ven, no sen mai contenti, se varden un co l’altro e no volen eser secondi a nesun,  se lu l’ha la television pì bela anca mi vui la television pì bela, se lu l’a la machina pì grosa  anca mi vui la machina  pì grosa. Eh si, l’era ‘n’altro spirito ‘na volta, ne bastea quel che se ‘vea e se ‘ndea ‘vanti co calma, dì par dì, senza voler eser quel che no se era. Ades inveze,  che tuti i volaria eser come Barlusconi,  i fa fatiga a contentarse de quel che i e. Co la crisi economica e Roma che ne magna medi schei in tase, riscen tuti  de tornar pì poreti de ‘na volta, ma se vergognen  de farse veder poreti. E ades, anca a costo de tirar la cinghia, ghe compren el zaino co la firma al bocia che va a scola, a Nadal fen feste che ne costa un ocio de la testa, par no eser manco de Toni e de ‘a Titina anca noialtri compren tut quel che lori i compra. Se caten magari a fine mese che no saven pì che santo ciamar co ghe n’e le bolete da pagar,  par fortuna che ghe n’e sempre qualche sorela, pare o mare, sempre pronti, ne ‘a bisogna a dar ‘na man. Forse l’e parché  son vecio, ma no son pì bon de capir la dent del dì de ‘ncò, i gira tuti come burli, i va de qua, i va de là, no i e mai boni de star fermi, epur mi stae cusì ben  senta sul me scalin, co ‘a pipa in boca,  a vardar  i boce che, co un semplice balon , i se diverte come mati.