Sirata palazziota

Bedda era la chesa di Palazzu auta la so turri campanara paria quasi tuccari lu celu a dispettu di la gimella vascia vascia chi si senti cunfunnuta e metti la funcia! La tò casuzza è dda chi aspetta a tia chi puru idda vulissi compagnia, c'è friddu 'nta ddi stanzi sempri chiusi ma lu focu chi addumasti ora l'inciamma e ogni cosa ora subitu quadia. Che beddu stari casa casa fora eni scuru e puru trunia, lu ventu chi supra li tetti sbatti e frischia spingi li nevuli chi fannu veniri l'acqua, chi piaceri è stariti vicinu a sti mumenti forsi eni lu cavudu, ora nun ti lu sacciu diri forsi chi mi pigliau la fantasia pi chissu ti pigliu pi li mani e ti li stringiu adaciu 'nta chiddi mei, l'allisciau, e iddi lu gestu ricanciaru, l'occhi toi taliannumi sbriddaru e comu si mi vulianu diri: "cà sugnu chiddu chi tu voi ju ti dugnu"! Allura ti spugliau e t'abbrazzau e ti stringiu dicennuti chi ti vogliu. T'addisiava, ti vulia e ti pigliau e sugnu forti e duci a lu bisognu, tenniru comu 'n sciuri, li minni ti vogliu teniri pi manu, quannu lu nostru rispirari pari chi addiventa tuttu unu, tu e jò, lu stessu sciatu lu stessu corpu chi resta a longu abbrazzatu!