A me matri

Si sulu tu putissitu sentiri stu cori 'nni lu pettu capissitu quant'è granni pi tia lu me affettu. Ti portu sempri cu mia 'nn li jurnati e i primi e l'urtimi pinsera a tia su didicati. Si la pirsuna cchiù duci e foddri ca ci sia e iu nun ti cangiassi mai cu nuddru, cridi a mia. Si allegra, 'ntilligenti e abbunazzata ma certi voti nun capisciu picchì si 'ncazzata. Pi furtuna ti vasta na vasata pi fariti turnari assirinata. Grazie a tia u sensu di la vita capivu e cu lu tò carattiri criscivu: a tutti ca semu forti vulemu addimustrari e u nostru cori sinsibili circamu d'ammucciari. Ti scrissi sti paroli ca tu nun t'aspittasti pi ringraziariti di la vita ca mi dasti. Ora ti salutu picchì aju l'occhi stanchi. Ti mannu na vasata e t'arricordu ca mi manchi.