Dialettali 3 giugno 2012 · lettura 4 min · 4763 letture

+ Segui

NENNELLA ^ Nennella se sta a fa' sigurenella, pe' tramente pazzea cu le cerase, nu paro pe' sciaquaglie, e s'ingioiella. E' un gioco villereccio antico assai intorno al carro di calendimaggio e po' che degna festa pe' la terra mia, bella e carreca d'alleria, femmene scaveze, uommene e le tammorre tonne. Pazzea, nennella, cu le ceraselle, dint''e capille s'è misa 'na rosa 'e ciardino, rossa comme curallo mò mò piscato a mare... e quant'è bella! L'AUCIELLE D'EDUARDO ^ Solitudine chiassosa di voli, Eduardo reca cibo ai colombi e planando gli uccelli beccano no no no no no, oggi nun tengo genio. Vulesse scrivere quaccosa d'Eduardo e de' palumme e della fissazione d'Edua' ca 'nce dà a mangia' ogni juorno, e nun se scorda; isso pote resta' dijuno ma 'e palumme no, l'aucielle hanna magna' tutt'i juorni, a' cuntrora. E se fa 'na chiorma 'e aucielli ca si 'nce passa 'nu crestiano ammiezo, se fanno cchiù là, 'o uardano cu 'n uocchio sulo e: te ne vaje o no? sembrano pigolare. Je già mi fisso pe' fatti mije, figurammece cu' Eduard' e cu' l'aucielle. Vulesse scrivere quaccosa d'Eduardo e de' palumme sulo ca, oggi nun tengo genio. CARMELA ^ Che vuo' dicere, Carme', che 'a vita è stata 'na scummessa storta ca nun è juta comme dicive tu? Me uardi cu' chist'uocchie nire 'e fuoco, ca parlano, sulo ca, je nun capisco. Dici, Carme'. Che vuo' dicere? ca nun abbasta nu' cielo celeste o 'st'aria 'e primmavera, ca 'o munno gira comme sape isso e no comme vulisse tu? Carmela mia, core pe' ciento vase, forse sarrà accussì: 'o tiempo se ne va, e va pe' fatt' suoje, nuje? nuje 'nce arravoglia e po', fernesce llà. Tutt''e dulure, 'e lacrime d'ammore, a ciorta jastemmata, la caduta, che so', Carme', che so'? Nuje simme vive, l'uocchio lampa ancora e 'a capa è fine, pe' furtuna. Carme', lo so, si' femmena, nun basta addore 'e mare, nun servono 'e parole nemmeno tant'ammore, si' femmena, Carme', 'o punto so' i denari. AFFORZA ^ Addà spunta', 'sta vita addà spunta'! Pure si vuo' murì ca te si rutt''o core e s'è scassato ammore; sulo 'mmieze 'e paure, cu' ll'uocchie 'nfuse e i pied'annure; pure si vuo' lassa' cielo e chianure d''int' terra e mare fore Castellammare, ammente a Surriento refola giallo 'o viento de' ll'arance. E po' si vuo' campà meglio pe' figlie, l'famiglie, 'stu cunsiglie 'e foglie sfrunzulate accà e a llà da lu scirocco: addà spunta', 'sta vita addà spunta'. Addà spunta' afforza! HAIKU NAPOLETANO ^ L'addore 'e cafè forte prufumma e sceta 'na casa sana. CORE GUAGLIONE ^ Suffrarraggio e suffrarraggio pe' chistu poco 'e zuccaro già misturato a fiele, ca nun se leva e nun m''o lieve 'stu disiderio amaro ca m'avvalena 'o core guaglione e senz`ammore. Suffraraggio, malanema. RINASCITA ^ M'hannu ditto ca se torna a nascere, e je me ne turnasse 'int' a 'stu munno, ma sulo pe' fa' ciento cose bone, no comme mò ca nun accocchio niente, e faccio tuttecose malamente. Je me 'ncantasse ancora sott'all'uva, e me stracquasse 'e sole e pummarole; m'arepusasse stiso 'nterr''a rena 'mpietto a 'stu mare ca me porto 'nfronte, po' m'astrignesse forte ammore mije, 'nce desse tanta vase, e tanta pizzechille. AMMO' ^ Scalinat' a mare, vasulate 'e suspiri, grare longhe comme nuvene 'e maggio, lustre pe' lu scennere e saglire. T'arricuorde? quanno venive ca se cangiava 'a luce si cu la voce doce tu me cercavi: ammo'... 'A ZENGARA ^ 'A zengara ca legge 'e carte 'mocca 'a scesa m'anduvinaje: " ci avrai fortuna e vita manifesta d'ammore, gloria e gran ventura." Vaco pe' strate e strate in cerca ma nun trovo e stanco e strutto je nun me fermo ma chillu juorno, sentite ammé, 'a zengara sbagliaje. 'O SAPARRAI ^ 'O saparrai, 'o saparrai. Quanno abbiarrai a dicere ca 'o ssai, 'o saparrai. 'O saparrai. - Fotografia di: Giovanna Lombardo.

♥ 0 💬 1

🌐 Pubblicata con licenza Creative Commons: puoi condividerla e ripubblicarla citando l’autore e la fonte.

Antonio Ciavolino