A ‘ffruntata

Rimbumbunu comu nu ventu, puru intra, comu fora i sentu, i rintocchi ra festa, forti e lenti, trasunu ‘nda l’ossa e ‘nda menti. Cunfusioni ‘ndo Rosariu, assaj genti, a musica a mortu, quasi non si senti, ora nesci a Maronna ‘ddulurata c’avi a scindiri chianu chianu ‘nda calata. Ri barcuni stritti stritti i parenti, ca panza china, ca facci ridenti, salutunu sutt’ e supra i cunuscenti, chi seri, pa funzioni, sunnu dolenti. Quantu su belli i giuvini figuranti, ‘nda prucessioni i misur’avanti, comu San Gianni e com’angiuli vestiti; ci griranu:”attenti! nommi cariti.” Passa lenta a Matri, cu velu niru, fermunu u brusiu, comu se viriru, ra vita u duluri, ra morti u terruri, e cercunu, ca lacrima, saluti e amuri. Ra Matrici cu nu scampanelliu, u Signuri ca bandera già nesciu, vicinu a chiazza u fannu spettari a undi a Maronna avi a ‘ncuntrari. Chi vestiti ra festa, i giuvini sudati, arretu i transenni asserragliati, occhijunu i fimmini e i masculi ‘ffacciati, ra funzioni, sunnu pocu e nenti ‘nteressati. Via! Via! Ca panza grossa fuj monsignuri, grirunu i paisani: ’viva nostru signuri! ‘ currianu cu forza Maria versu Gesù, ra ‘ffruntata non si di poti ‘cchiù. Focu sparunu a tutta forza, tutti a via marina, i corsa, scumpari a vuci ru narraturi, ogn’annu è Pepè, u professuri. L’eccitazioni ra matina, a prucessioni, a ‘ffruntata; mumenti d’amuri carnali ru paisi cull’amata. Na Lunga, lenta, sensuali priparazioni, pe na brusca, scoppiettanti conclusioni. Cu Pasca a stagiuni ‘ncuminciau u sangu ‘nde giuvini si ‘nfiammau, po ‘namuratu, jorni di turmentu, sa fimmina no voli u fidazamentu.