Dialettali 19 maggio 2021 · lettura 2 min · 970 letture

+ Segui

E tu ca sì pe me nu se e nu ma te spasse ‘ncopp’a terra a ‘ntravuglia’ sparanno sentenzielle ‘nzuccarate sfuttenno ‘o sacicciotto a chi t’è frate ma ‘a ‘nzogna nun fa ‘a lappa senza ‘o puorco e ‘a sciazza nunn’è lota senza ‘o spuorco. E tu ca si pe me nu va’ e n’embè t’è fatto na cuperta chiena ‘e ave’ pittanno na tempesta ‘nzazzaruta sulianno meza faccia scanusciuta ma ‘a vita senza core nun se tratta e ‘a notte priv’e suonne nun s’accatta. E tu ca sì pe me nu viernarì nun dice puntualmente maje nu sì cantanno serenate assaje schiattosa sunanno ‘a chitarrella cchiù lagnosa ma ‘a luna senza cielo è nu ziracchio e ‘a penna senza foglio è piripacchio. E tu ca sì pe me nu sì e nu no t’è miso ‘ncopp’o trono c’o ‘ndindò cercanno ‘e fa’ ‘a reggina ‘e tutt’a storia scavanno sulo scuse int’a mammoria ma ‘a preta senza sciummo è na muféta e ‘a fronna senza verme nun’è seta. E tu ca sì pe me nu poco ‘e cchiù t’affacce a sta fenesta a fa’ zu- zù sbarianno notte e juorne dint’o pietto facenno a sta campata ‘o scarfalietto ma ‘o ffuoco senza lampa è na pastetta e l’ommo senza ‘e te... CHE BARZELLETTA!

♥ 0 💬 1

© Tutti i diritti riservati. L’opera è protetta dalla Legge 22 aprile 1941 n. 633 sul diritto d’autore: è vietata la riproduzione, anche parziale, senza il consenso dell’autore.

Peppe Cassese