Dialettali 4 agosto 2021 · lettura 1 min · 1048 letture

+ Segui

E ‘ncoppa ‘e spalle ‘e nu gigante nano ie ce saglievo senza ave’ paure e ‘o cielo se tuccava cu na mano e ‘a strata nun mmustava nervature. E dint’e bracce ‘e chesta chianta rara ie so’ crisciuto senza nu turmiento e ‘a notte se cuccava fresca e chiara e ‘o juorno se scetava faglio ‘e viento. E ‘ncoppa ‘o fronte ‘e chesta terra antica ie ce truvavo genio e magaria e ‘o sole nun sapeva maie ‘e fatica e ‘a luna scancellava ‘a malatia. E dint’o core ‘e chistu puorto allero ie me sentevo fitto na criatura ma ogge ‘o munno nun’è cchiù sincero e ‘a vita se smatassa fredda e scura. E mo’ ca ‘o suonno nun canosce ‘a via ie metto ‘a ‘nziria ‘ncopp’a vocca ‘e n’ato e ‘nchietta a isso canto ‘a nustalgia pe’ chillu munno scigno e scarcagnato.

♥ 1 💬 0

© Tutti i diritti riservati. L’opera è protetta dalla Legge 22 aprile 1941 n. 633 sul diritto d’autore: è vietata la riproduzione, anche parziale, senza il consenso dell’autore.

Peppe Cassese