Dialettali 2 marzo 2022 · lettura 3 min · 850 letture

+ Segui

Streghe, maghe e fattucchiare se ne contano a filare... So’ cchiù ‘e ciento so’ cchiù ‘e mille e te sonano ‘a diasilla. Certo è gente c’anduvina chesta è gente ca è mappina. Sape ‘e tutte tutte ‘e cose o so’ spine o songo rose. Mbroglia, ammesca, ‘nzorfa, venne e t’avota a vienitenne... Chi te dice ca dimane cagna ‘o viento ‘ncoppa ‘a mano... Chi t’a conta cruda e cotta tanto ‘e sorde tuoie s’agliotte... Chi, sapenno ca nun saie, t’apprepara quacche ‘nzaio... Chi facenno na fattura cchiù te spremme e cchiù te cura... Chi guardanno dint’a palla te ‘mbriaca ‘a capa e ‘o callo... Gente ‘e razza ca scummette e te venne ‘o tiempo a fette, ca ‘nzapona ‘a panza e ‘o core a chi crede ca l’ammore enno a justa medecina ca fa doce ogne matina... Gente nobbele e cortese ca, abbastante nu turnese, t’anduvina tutta ‘a vita, si si scigna o si si zita, si ‘a fatica è nu sparagno quanno ‘a morte è nu guadagno... Comme ‘e daie nu poco ‘e spavo si felice, pecchè...pave! Ma so’ maghe o so’ ‘mbrugliune? So’ scarzelle o so’ scarpune? Penza chello ca vuò tu: tutto ‘o riesto arriva ‘e cchiù... Streghe, maghe e alchimiste, so’ marpiune o farmaciste? Fanno tante ‘e chilli ‘nciarme, spullecanno quatte sarme, ca perfino ‘o sapunaro ’addeventa gallenaro... Fanno certe paparotte, meze crude e meze cotte, ca perfino na rezzola t’addeventa pummarola. Ma sta gente è altolocata pecché ‘a vita s’a studiata!... Comme gira, comme vota, comme è tunno ‘o munno e ‘a rota, ca te sfronna e te scumbina, ca te ‘nzorfa int’a matina e te mette ‘nfaccia ‘o sole e te fa tremma’ stu core, mente ‘a sciorta mariola te guverna e te fa scola. Streghe, maghe ed alchimiste... so’ papagne o songo ‘nziste? Hanno fatto pure ‘a storia e... scuprenno int’a memoria... quacche paggina ‘ntricante, fatta ‘e risa e fatta ‘e chiante, v’a cuntammo a modo nuosto, tanto niente a vuie ve costa... Streghe, maghe ed arriviste... songo ‘e primme ‘e ‘ncoppa ‘a lista! Ne so’ tante, so’ miliune... meglio ‘e loro... maje nisciuno! Songo padre o songo figlie, nun se perdono nu squiglio... Songo mamme o ‘nnammurate... songo tutte na mappata! Stanno appriesso a na bannera ca s’e porta allera... allera... ’nzieme a ‘o viento ‘ncoppa ‘a luna tutte quante a uno a uno... E cu loro che muniglia, fatta sulo ‘e piglia- piglia, fatta ‘e famma maje saziata, ’e semmenta maje scamata, pecché sanno comme fa’ pe te fottere e babbia’... Streghe, maghe ed arriviste vanno in giro p’e caniste, pe na seggia, na pultrona, nu sparagno, na canzona, cu tre note sempe ‘e stesse (chelle ca te fanno fesso)... e prumettono na vita fresca, doce e sapurita, poche tasse e cchiù guadagno doppo scuopre ‘o magna- magna... Quanno tu rummane asciutto, ’nnutto, strutto e ‘o riesto rutto... Chesta è ‘a vita, genta- gè! Chi ‘a canosce meglio ‘e te? Chesta è ‘a vita, c’amma fa’? Loro... in alto... a cumanna’... nuie cca sotto... a spurmuna’!

♥ 0 💬 0

© Tutti i diritti riservati. L’opera è protetta dalla Legge 22 aprile 1941 n. 633 sul diritto d’autore: è vietata la riproduzione, anche parziale, senza il consenso dell’autore.

Peppe Cassese