Vita nova

M’aggio pittato ‘a faccia stammatina pe’ l’urdema jurnata che bellezza e già ‘a dimane amice n’ata rezza int’a stu mare ‘e pace se ‘nfarina. M’aggio inventato ‘a meglia fantasia fatte ‘e culure giallo verde e russo e azzurro tengo ‘o core e pure ‘o musso sapenno ca sta sciorta è sulo ‘a mia. ‘A dimane me sceto senza patto e me stongo attato frisco e schietto. C’o sole e c‘o rilorgio ie nun cumbatto cchiù nun ‘mporta si me sbatte ‘o pietto. E mo v’o dico e vuie signate ‘o fatto: ‘A ogge sta madamma è scarfalietto! E comme a nu cunfietto m’allicco ‘o doce ‘e chesta vita nova e conto cu priezza che se prova.