Cumpagneddu da me vita

Griggia è a terra, griggiu è u celu, ccù la negghia d'intra l'ossa assappanatu ci hai lu pilu, cavadduzzu "peddi e ossa"! Jamu, forza, brusca e strigghia ca t' impaju a la parigghja. Forza, 'mpari, ppi la strata a vuscarini la biada. Cchi succeri stà matina? accucciateddu 'ntà la pagghia ci hai surata la carina e tremi tuttu comu fogghia! Cumpareddu da me vita, chista è a fini di la strata! Chistu è l'ultimu viaggiu! Supra u cocchiu ci sì TU! Fra li stanghi misu jù, ca ti portu, mestu e moggiu, ccu la negghia d'intra l'ossa a ripusari 'ntà la fossa! I finimenti e la tistera, cummigghiati 'ntà la terra, jù ccu iddi, attagghiu 'i tia, mentri a luna ni talia, mi cummogghiu c'a cupetta: " Cumpagneddu, vegnu..., aspetta "!