Dialettali 16 luglio 2012 · lettura 2 min · 1510 letture

l + Segui

l'hanno miso a capotavola. ma che l'hanno miso a fa' si nisciuno 'o sta' 'a senti'? chillo povero vicchiariello che s'aiuta cu' 'o bastone quanno dice quacche cosa fanno finta 'e non capi'. e si sulo arape 'a vocca tutte quante 'o danno 'ncuolle. - mamma mia non 'o supporto! -ma pecche' non se sta' zitto? -so' trent'anne che 'o dicite: 'e tedesche, musullino, famme, guerra, priggiunia e mo' basta pe' piacere! ...e 'o viecchio, sulo sulo -pure si sta' tanta genta- se murtifica e non parla. e assettato 'ncoppo 'a seggia guarda 'nterra, scapuzzea e preja a dio e muri' ampressa tanto che ce campa a ffa' si da' 'mpicce a tutte quante e non po' neanche parla'? sulo 'o juorno d'a pensione s'arricordano d'o nonno, po' pe' ll'ate trenta juorne pare 'a sporta d'o tarallaro. ...puvuriello! ha passato 'a vita intera tra fatiche e sacrificie pe' ffa' crescere 'a famiglia. era pure addeventato na' perzona assaie importante: riverito e rispettato po' cu' 'o tiempo e 'a vicchiaia cchiu' nisciuno 'o calculava. io 'o cunfesso 'o peccato mio: quacche vota pure a me' me da' fastidio. po' me fermo nu'mumento e me metto a ragiuna': - ... ma allora chesta è a sciorta che aspetta pure a me'? e 'o core me se stregna a penza' che tra quacch'anno faciarraggio 'a stessa fine. non è giusto, non è onesto. e accussi' all'intrasatto guardo 'o viecchio e penzo a me. e facenno finta 'e niente me ce accosto cchiu' vicino e lle dico: - jammo 'o no'! raccuntateme nu' poco e quanno vuie e amice vuoste v'arrubbasteve 'e galline do sergente americano! e 'o nonno s'arripiglia e cu' ll'uocchie che le ridono accummencia a raccunta'. io ' o fatto 'o saccio gia': l'aggio 'ntiso tanta vote! ma che fa' si 'o sento ancora? perdarraggio na' mez'ora? ma almeno pe' mez'ora s'arricorda 'e tiempe suoie e se sente ancora vivo! prejo sulo 'o pataterno che quann'e' 'o turno mio ce sarra' quacche nipote che me dice:- jammo 'o no'! raccuntateme nu poco... ...e accussi' m'allonga 'a vita.

♥ 0 💬 0

© Tutti i diritti riservati. L’opera è protetta dalla Legge 22 aprile 1941 n. 633 sul diritto d’autore: è vietata la riproduzione, anche parziale, senza il consenso dell’autore.

luigi abbro