Sulla mia poesia, introspezione. Come nasce un poeta dialettale. (in dialetto ve

Parlando co’ la sola che me capisse, e no l’è me mare se intende, che quele ai fioi le ghe perdona anca le bastieme, guardando la bona intension, ho capìo che dal bon quando ciapo in man na pena, no riesso a far de manco, con tutta la bona lena, drio a biceri de cieli in fiame e palanche de bele robe o brute disgrassie, de finir a parlar de le me magagne. E so lagne a sercar parole che rapresenta n’emossion, e vardete intorno e segnete so quel che vien dala natura, o inventa ‘na radura che no esiste e dopo sempre in fondo parlar de ‘na roba triste. E la ghe proa, la ghe provaa, e la le capisse, el linguagio del poeta sconsolato e triste, ghe piase parché l’ho scrita mi, che l’ esse scrita n’ altro magari gnanca la le lesarea, no capendo n’ostia de tuto sto casin. Un di’ la me ciapa da parte: “ Usa el dialeto che almanco te vien in mente robe bele, te par de tornar butin, quando se piansea par na cassada e se ridea de le capele”. Me par se lesa in ste tre righe che l’ho ciapà in parola, anca se par essar brao area dovuo catar fora ‘naltro argomento, invece che fermarme a quel che l'ha m'ha ditto, ma son sincero staolta, l’ho fato a posta. Par metarghe in testa che ho capio sa la vol dir quando la me spiega qualcosa e da ancò fin che moro ogni sera sul cussin se podesse ghe farea catar ‘na rosa. Bela mia te ghe rason, a credarse n’artista se perde la pasion, te te cati serà in presòn sensa gnanca rendartene conto, finché non te guardi quel che t’è scrito, quel che è sta fato, svejandote pien de magoni. Ho pensà par un pel de poder andar via coi cagoni, no gò pasta par ste robe, me piase le stampele che me da la tera moja, sentirme sul col l’odor de la paja, e solo una la g’ha avù el corajo de smontarme volendo capir, fasendo centro, direta, selvadega, sceta, sarea in bisogno scrivar su un toco de carta, ma gnanca la volta celeste sarea adeguata, a tanti strafalcioni, pensieri, drammi, gioie emozioni. Da ancò voi provar la poesia e l'amor sceto sceto, quel in dialeto quando son mi e no n'altro, che tanto i le sa come parlo.