Dialettali 30 maggio 2018 · lettura 2 min · 819 letture

+ Segui

Serte robe i è come un muro, fate ben, a piombo, in bola, le te fa sentir sicuro. Malte grese che se suga, muradori par la casa, seci, onto e segadura, pensa a quanto che se paga! Un bel casin, non ve do torto ma l’è el preso da pagar parché el muro non sia storto. Finché riva un po’ de bianco, a trasformare sta creatura, animarlo con la prima vera mano de pitura. L’anno dopo la seconda, poi na tersa a rinfrescarlo, a pensar a come far, anca un po’ par migliorarlo. Ghirigori, stuco e gesso, par far finta nol sia el stesso, fade e puoti ai buteleti, le steline, gati e orseti; E dopo bianco e blù e marrone, ogni anno, o ogni stagione. Finché un dì nol perde i tochi, el se desgrosta gravemente, che na mano de pitura, la risolve proprio gnente. O te sgrosti fino in fondo, te rifè la finidura, ancora seci e via laori, muradori e segadura, malta fina, gesso e stuco e dopo ancora la pitura; o te piansi quel che è sta, che te vedi fra quei busi, in senocio, in piè o sentà, coi oci verti, oppure chiusi, col sguardo perso e imbambolà de un mona che varda un muro sgrostà.

♥ 0 💬 0

© Tutti i diritti riservati. L’opera è protetta dalla Legge 22 aprile 1941 n. 633 sul diritto d’autore: è vietata la riproduzione, anche parziale, senza il consenso dell’autore.

Marco Zuffo