Tejar bon el butìn

Bisòrea imparàr a tejar bòn el butìn, a farghe sentìr che se ghe vòl bèn, ma se bisògna se g’ha da spetàr, sensa piànsar, rabiàrse, bàtar pugni o cavàrse cavèi, che ghe momenti de magra e pochi de schèi, che no se pòl averghe tùto in prèsia e che ale olte la natura la smìsia le carte lasàndo da parte ahimè sempre quèi, e che no è dito sia bèn o màl, ci ghe tòca sa ghe tòca l’è quèl che ghe spèta. Eh si, averghe pasiènsa, no darghe el momòn quando el sìga, no farghe guardàr el cartòn, cavarlo da quèla carèga cantando na bela cansòn. E a ci me dise: “ Ma mi no g'hò fiòi, ne’ neòdi” Rispondo: ” No parlo de pròle, vabèn, le parole le se pòl anca interprètàr, gavea in mente piutòsto un òmo maùro che pianse insicùro, scomodando santi e madòne, impenendose el còr e le braghe, del colòr che sta bèn nele pòce in meso ale strade ” L’è istesso el parchè, mejo nàr vanti, a dir che pàr tanti l’è n’impresa, tejar bòna la parte indifèsa e malmaùra, quel che dentro te ciama vendeta, la sciopa de invìdia, l’è sempre irequièta, la se mòve, nela pansa. L’è come na buela scònta, na raspa che màca sun fero duro, e nol mola se te ghe dè corda, e imagina più te moli più el se incàssa e pensa un po’ sal pòl far, co’ in man 'na pistòla. Vedi tì, se no val la pena tejerlo bon, dentro n’òmo che dorea darghe nà drita, e no sbasàrse al so livel, ma nar sempre un po’ più a farlo vejar maùro, e a ciamàrlo ale olte a sugàr. Vedi tì mi quasi perdo la testa, g’ho quasi perso el sono, me n’è capità uno tòsto, santa pasìensa.