’a funtanella

Propete ’nfronte ‘o “Scoglio Ventiquattro” nce sta da sempe na funtanella ‘e ghisa antica assaje addò ogni juorno precise a mmiezze juorno, se fa na folla ca vo’ veve e se vo’ sciacquà. È nu spettaculo! Uommene, femmene, criature, viecchie, giuvene e figliole fanno a chi primma ‘e piere e ‘a vocca se po’ arrefrescà. Se ‘ntrecceno facce, mane, cosce e dint’a chella confusione. ‘e ccriature se ‘nfilano pe sotto pe ffà primme ‘e tutte quante. Di solito, a chell’ora pure je passe da llà. Guardo ‘o mare e ‘a funtanella e penzo. Ma vire nu poco che succere ‘ncoppa a sta terra. ‘O mare a tutte dà na mane. è chieno ‘e pisce ca l’umanità cunzuma senza ringrazià nisciuno, cura ‘a salute e ce fa divertì, eppure, sta funtanella ca votta acqua roce e fredda e ‘a sete leva, ‘o mare fa scurdà. Sta meraviglia è frutto d’ ‘o sturio ‘e quaccheduno ca facette sta differenza sustanziale. Na cosa è certa, reflettite assai. L’acqua salata senza chella doce sarebbe ‘a morte ‘e llUmanità