’O mese ‘e marzo

Chiure ‘a fenesta, trase dinto, lassa ‘o friddo ‘a parte ‘e fore... stamme a marzo, chillo ‘mbroglia, sfruculea peffino ‘o sole Pure ajere succedette, cammenavo pe’ furia... si sapisse che jurnata... manco ‘o ‘mbrello me purtaje Verso ‘e diece - ‘e diece ‘e meza ’ncapa a me ‘nu nuvulone, scumparette tutt’’a luce, po’ facette lampe e tuone Manco ‘o tiempo ‘e fa’ duje passe ca venette n’acquazzone, nun te dico senza ‘mbrello... ’nfuso pure int’ ‘o cazone E po ‘o friddo, cose ‘e pazze, tutto ‘nzieme se gelava, n’ora primma era ‘a stagione, quase ‘na jurnata ‘e mare Io tenevo ‘a cammesella, justo justo m’a ‘ngignaje, se facette ‘na schifezza, nun saje commo me ‘ncazzaje Me ne stetto ‘na mez’ora fermo sotto ‘a ‘nu balcone, pò d’’o cielo finalmente riturnaje ‘na lenza ‘e sole Ma stu mese overo è pazzo, ripeteva ‘nu guaglione, pe’ tramente ‘o rispunnevo... n’ata vota ‘o nuvulone! Sto scucciato, che turmiento, nun facesse manco ‘a spesa... ogge forse è pure peggio, n’atu ppoco vene ‘a neve Siente ‘o viento comme scioscia... sta chiuvenno ‘a stammatina, si tu aspiette ca fernesce, può caccià pure ‘a brandina... Ch’amma fa, ce vò pacienza, sò ‘e capricce ‘e chistu mese, vire ‘e nun te scurdà ‘o ‘mbrello... ca faje ‘a fine mia d’ajere...