’O jucatore ‘ncalluto

Te prumetto ca ‘a dimane cagna tutto, scuordatelle sta jurnata, vide appriesse... chesta è ‘a primma vota ca jucamme ‘nzieme, nun può mica avè furtuna ampresso ampresso... Picceri‘,ma tu ‘e capito o no chi songo? t’e ‘nfurmato buono cu chi staje parlanno? t’issa credere ca so ‘nu principiante... vide ‘e nun spustà ca vocca, statte accorto All’ippodromo me sanno tutte quante, ce stà sempe chi me cerca ‘nu cunsiglio, chill’amico ancora vene e me ringrazia... l’atu juorno se n’è ghiuto chine ‘e sorde Che te cride ca ‘o rispetto è cosa ‘e niente? si’ nun tiene ‘e palle ‘a sotto, chi te penza... ’a fiducia se guaragna cu ‘a pacienza, mica ‘a danno ‘o primmo strunzo ca se ‘ncontra... Pe’ dimane già aggio fatto ‘nu penziero... e si vuò fà chiene ‘e sacche nun fa ‘o scemo, ce vedimme ‘e cinque sott ‘a casa toja, nun è cosa n’ata vota ‘a casa mia... ’O problema è sempe chillo,’o saje, mia moglie, va dicenno ca me joco pure ‘e panne... nun capisce ca si ‘o faccio è p’a famiglia, io nun songo ‘nu malato comme a tante Chella penza ca se perde sulamente, nun capisce chesti cose comme vanno... quanno fà cìerti discorse... jesco pazzo, nun ‘o saccio chi ma dà tanta pacienza Uè guagliò,m’arraccumanno, nun fa tarde, ca dimane se recupera alla grande... pienze sulo a piglià ‘e sorde ‘a coppo ‘a banca, io t’o giuro, mò nun tengo proprio niente...