Isaura

It’est custu misteriu de sa vida chi faghet male cando ‘enit furada cun amargura e de mala manera? It’ est custa nostiscia a prima sera, chi arribat fritta che una temporada e lassat tota s' anima atterrida? Cagliati, Oliana cara, addolorida, ca custu mese ‘e agustu finit male cun basos de su sole e de maestrale, a festa manna appenas concruida. Isturdidu, suspendo versu e rima ca su dolore est troppu e lu cumprendo, versu e rima, isturdidu, los suspendo ca lu cumprendo su dolore anzenu. Siant clementes giuighes de terrenu gestu de mala sorte e de isaura, ca est ora de silentziu e de tristura a pustis de aer godidu sole amenu... Ti torrent tempos de dulche lugura, orfana creatura, e de cunfortu, ti torret sa lugura, a pustis mortu su sole chi t' aiat dadu natura.