Si poete

Si poete esser' istadu pro un'istante aia cantadu a sa manera antiga un'ottada sulena pro un'amiga, anima cara, e pretziosa amante. M' est duru mestieri, m' est fadiga ca s' estru est toppu cun sa limba anzena, però aia invocadu a sa serena luna lughente azudu e bona manu. O anima chi ses amargamente, pro fortza 'e su destinu soberanu, in logu chi su sole onzi manzanu s' impignat a iscaldire vanamente, o anima, pro te, chi ses comente un'alenu fuidu in logu arcanu, de unu dolore frittu e frecuente aia contadu, e de su prus galanu amore mai finidu in su niente, contr' a sa fine 'e su destinu umanu.