Attonzu

Custu merie si parat solianu, paret maju torradu a fura a fura, su chelu giamat s' anima a premura comente a nova ispera su beranu. Est un'attonzu pasidu e caente, finida sa binnenna, a s' aradura si preparant sos campos e in cresura s' appiligat un'erva prus lughente. Però s' idet in s' aghera tristura che chie appat perdidu mescamente sa lughe de s' amada gioventura, ca non frimat sas oras de repente sa sorte ch' at in astros sa lugura e in s' omine s' arcanu prus ardente.