Aprile

Lizera che unu bolu ‘e mariposa, che i sas alas friscas de su ‘entu, che sas istellas de su firmamentu, de sa luna creschente prus donosa, ti mi paras in coro cun s'ammentu, bella cantu sa fada prus grasciosa, e pro cantu bi duras non b'at cosa chi mi lasset gai s'animu cuntentu. Su sole iscaldit s' ora generosu, si fuint sas umbras malas de tristura, in d un’attimu isvanit s’amargura, e cantat torra s’animu diciosu. Cagliat s'inseparabile paura chi m' accumpagnat tantu e mi dat pena, cantant s'amada, antiga cantilena sos puzones, finida s'astraura. Aprile, chi rennovas cantu e rima, intona cun sa 'oghe tua sonora sos delicados muttos in cust'ora, dilettami a su solitu che apprima. E sena ismentigare it’est su dolu m’ app’ a giogare cun sa fantasia, torrende insegus a sa giovania cando fit bella che puzone in bolu.