Finide, vanidades

Finide, vanidades, ca no est ora, sas lusingas amenas d’istajones passadas, ca sunt mortas sas rejones de istare cun sa musa incantadora. Non b’at motivu de tentatzione ca drommit s’attrividu sentimentu chi faghet donzi coro prus cuntentu a s’ora ‘e s’amorosa intentzione. Como bos miro cun afflitzione e mi torrat in costas sa puntura, de sa finida, ardente gioventura chi a donzi passu fit inventzione. Lassademi, a sa settida, pasare, amadas visiones de su mundu, bos app’amadu in su tempus giocundu como mi bastat solu a l’ammentare. Onzi cosa mortale det passare, ma non finit sa lughe de s'amore che uttìu lughente de limpiu lentore cando su sole torrat a pesare. E non cessat su coro ‘e si turbare che chi esseret novella s'istajone, un’arrejonu nou, una chistione difficile a cumprendere e isplicare.