Anneu

Cantu m’anneat sa morte bida in cara de poveras creaturas mescamente, m’imboligat faeddos in sa mente e s’anima no ischit su chi nara (t). Ite cruenta sorte in sos lontanos giassos de Mare Nostrum, cussa gente cun duos istratzos supra, e prus niente isfidant morte cun su nudda in manos. Isperant in tempestas piedosas, drommidas in sa funda oscuridade de sos abissos ch’eppana piedade, e in nottes sena bentu, luminosas. Da poi in sas sentidas preghieras a Deus chi podet, summu, totugantu, pro chi mustret s’approdu a sas isperas ch’in coro ant coltivadu cun s’ispantu. Carchi 'orta, lontanas sas costeras, restana attesu, e prus sa notte iscura est funda, luego est tottu un’ isaura, finit sa brama ‘e terras furisteras. E in sas marinas limpias su manzanu bessint a pizu vestes coloridas, cosinzos, restos umiles de vidas frimmadas dae s' ingratu coro umanu.