Giudisciu Universale

No isco si b’at chelu a pustis mortu pro chie onestamente at operadu, no isco a cale fine est destinadu s’omine, cun rejone oppuru a tortu. Non cumprendo nemmancu cale importu appat sa vida nostra casu mai tottu finat cun gioias e arguai, e s’ untzione estrema pro accunortu. No isco chie nos dat su passaportu pro s’eternu gosare o cale pena m’isettat, si flagellu o sa cadena chi non mi dat ispera de cunfortu. So che foza trazada dae su ‘entu in d unu logu amenu e bellu tantu, app’idu sos colores e- i s’incantu de totas istajones ch’appo tentu. Un’alvure maestosa m’at sustentu e m’at nutridu a linfa naturale, como so ruttu supra ‘e unu murale, finidu cun s’attonzu onzi cuntentu. Luego s’ierru est frittu cun maestrale, e mi det bentulare a isfinimentu cun su perenne, arcanu movimentu innanti a su Giudisciu Universale.