Notte 'e Nadale

Ite mi das in sa nodida festa, ammentu de su tempus coloridu, cando su giogu fit bellu e bramidu che sole giaru a pustis sa tempesta? Ite mi torrat de cust’ora istrana fuinde da una a s’atera buttega, ite mi torrat si non b’at allega ch’intenda in sa carrela o dae ventana abberta a una lughente atera ispera? Torret sa lughe ‘e sa serenidade in custa notte limpia ‘e preghiera torret in donzi groga soledade su risu de un’amabile chimera. Cesset piantu e dolu custa sera, luego festant tottus su bambinu, amparu pro chie est solu in su camminu che vela intro sos bentos de bufera. Leade in bratzos cussu miserinu ch’ est iscampadu in terra furistera a gherras, nieddu famine, e galera, chirchende libertade e determinu.