Umbras e lughes

A narrer ch’est una die serena non podo pro sa giusta beridade, si fit istadu a modu in soledade mi dia cantare che una filumena dende cristallos de sintzeridade pro poder cunfidare carchi pena. Leugo est sero, e jerru mescamente rendet sa soledade prus dolente. Su fogu giogat cun fiamas ridentes e iscaldit umbras dae sa ziminera, sonat sas trumbas una primavera chi lena lena mi torrat in mente. Fit tempus de carignos e chimeras inchesas, sena frenu, in pitzinnia, de povertade amiga de allegria giogàda in sas biancas camineras. A pustis su lugore ‘e sa poesia penetraiat su coro cun s’accisu e mi poniat in venas su pilisu suavemente, amada giovania. A narrer ch’est una die serena non podo pro sa giusta beridade, s’aere appidu fortza e calidade de versos prus adattos a s’ iscena, aia cantadu cun calore e lena, ma non nd’appo talentu e facultade. E gai su tempus sighit a colare cun timorìas e brios de mentovare.