A sa luna

Tue chi sos amantes no accumpagnas a sos secretos logos de s’amore, o luna, as cambiadu modu e umore, as perdidu, iscuntenta, mira e bramas. Non t’ant prus in devotu cunsideru, ne ti chircant a s’ora ‘e s’ermosura pro unu basu innotzente dadu a fura, giurende amore eternu e verdaderu. De sos amoradores fis patrona, ispiraias poetas delirantes, sos bardaneris puru, e sos amantes chi toppaiant a cua innorabona. Ti moves como in chelu che battìa, attesu dae festosa occasione, a s'oju mustras trista devoscione paret chi t' 'incat sa malinconia. A mie as dadu in nottes de lugura, s'incantu de sas rimas prus donosas, m' as battizadu a s'estru 'e sas diosas che bona mama, cun calda premura. Pro more tua, poeta, appo cantadu s' accisu 'e sos amores costoidu in coro, finas cando appo finidu s'allegru ispassu 'e su tempus passadu. Però de te no mi poto olvidare, e como chi beranu est arrivende iscampio a sa ventana e t' ido andende, cuntentu ‘e su chi ancora m’as a dare.