Lamuri di 'na matri

L'amuri di 'na matri è accussì granni ca natru 'u stissu nun si po truvari, ponu passari tanti e tanti anni è sempri chiddu, nuddu 'u fa canciari 'ncumincia quannu sì intra d'idda ca ti disegna ccu la fantasia puru ca sì quantu 'na nucidda fa li so cosi mentri penza a tia. Ti parra, ti fa sèntiri 'a so vuci, ti cunta 'i nuvità di la so vita, poi tocca 'u ventri ccu li manu duci e fa lu cuntu di misi ccu li jita. E quannu di duluri arriva l'ura ti raccumanna 'a vergini Maria, pur'Idda matri e di santa natura ca t'accumpagna sempri ppi la via. E quantu voti 'a notti la fa jornu quannu chianci e la fami ti veni, ccu l'occhi aperti e 'ntesta lu fastornu ti strinci o pettu e lena li to peni; poi t'accarizza 'ndi la to facciuzza, ti fa la 'nnacatedda duci duci tu chiudi l'occhi mentri 'a to mammuzza ti canta a ninna nanna a menza vuci: Passa lu tempu, crisci e ti fai granni, lu munnu 'u vo' pigghiari a muzzicuni, Idda sta pinzirusa e 'ntra l'affanni soffri ppi tia, ma tu nun ti n'adduni. li notti aspetta a tia 'ntra 'i fastorni sta ccu l'aricchi a sèntiri u purtuni e si cueta sulu quannu torni poi chiudi l'occhi 'ntra du' suspiruni. ppi idda 'un crisci mai, sì sempri nicu ti chiama sempri ccu lo so mizzigghiu, difenni sempri a tia d'ogni nimicu lu scopu da so vita è ppi tia figghiu e mentri la so testa si fa bianca la forza s'assuttigghia e li duluri sempri cchiù spissu tu la vidi stanca ma nun finisci mai di dari amuri.