Vulìssi

Vulìssi arrisvigghiarimi 'nmatinu, a l'ura quannu 'u suli è 'ndu spuntari comu n'aceddu vulari di cuntinu tuttu lu jornu senza mi firmari. Vulìssi ca lu ventu dilicatu m'accarizzassi duci duci l'ali e vèniri di iddu traspurtatu unni è ca vola l'aquila riali. Vulissi quannu arriva a lu scurari supra 'na nuvula cunzàrimi lu lettu e ccu la scusa di mi ripusari strìngiri 'na stidda nni lu pettu. Vulìssi da luna fàrimi annacari 'nmenzu ddu celu di stiddi ricamatu tutta la notti finu a lu gghiurnari prontu a vulari friscu e ripusatu. Vulìssi appujari intra 'nu giardinu e sèntiri 'u prufumu di li ciuri ccu l'atri aceddi fari lu fistinu cantannu 'i canzuneddi di l'amuri. Vulìssi vulari poi 'ndu tò balcuni ccu rosi e margheriti a lu sbucciari a tia bidduzza dàriti un vasuni e lu ma cantu a tia didicari vulìssi èssiri 'nciuri 'nda rastuzza ca lu matinu vèni abbiviratu accarizzatu di li tò manuzza e di to' occhi beddi taliàtu. Vulìssi sempri vinìriti a truvari e fari 'u nidu sutta 'i tò canali assemi a tia mittìrini a vulari senza èssiri aceddi e avìri ali