Africa

Vucchi affamati, schelitri viventi, vita signata di maligna sorti, occhi impluranti, straziu pungenti, senza 'na curpa cunnannati a morti. Ossa, pusati 'ndi la nuda terra, abbannunati senza sipulturi, sulu 'a pietà du' ventu li sutterra: ccu 'a sabbia cummogghia ddi criaturi. Morti, ca lassa a tanti indiffirenti, di sta mattanza, di sti sceni orrenni, mentri cu di lu saziu è scuntenti e du' suverchiu sempri cchiù pritenni. A vui dumannu senni scuitati ca suffirenzi nun nni canusciti "unni è l'amuri ca tantu pridicati si 'ndi lu cori pena nun avìti?" Cristu ca è la fonti di pietati, murìu 'ncruci ppi l'umana genti, mentri tu omu ca vidi st'affamati, fai sempri l'orbu e nun ti movi a nenti!